Mylnå Volda

Historie

Mylnå i Volda har tradisjonar frå 1864, då den vart bygd ved Øyraelva, og vart driven med vasskraft. Seinare vart utstyret flytta til Dalebuda på Rotset, der ein dreiv til bygget brann ned til grunnen 13.12.1936. Aksjeselskapet Volda Elektriske Mylne AS vart skipa i 1930, og noverande mylnebygg stod ferdig i 1937. Mylnå vart bygd som ei moderne bygdemylne, der 3 kverner stod på rekke, med drift frå ein underliggande drivaksling. To av desse kvernene er framleis i drift, den tredje vart fjerna under byggeprosessane på 80-talet, men vart restaurert att i 2010. Av andre maskinar som har vore i drift frå 1937 kan nemnast valsestolen, skalmaskina og den elektriske platetørka.
Volda Elektriske Mylne har i mange år no vore den einaste som er att med utstyr, kompetanse og prosessar frå 1930-talet som framleis er i kommersiell matmjølproduksjon.
Her tek ein vare på gamle tradisjonar, handverk og produkt samstundes som ein arbeider aktivt med nye idear og råvarer. Det er moro å kunne stadfeste at dette gamle utstyret kan male t.d. fiberikt korn, mask (bryggeriavfall) og blad og skot av lauvtre til fint mjøl utan å måtte sikte bort noko. Dette let seg ikkje gjere i den moderne mølleindustrien eller på moderne steinmøller, og er ein av grunnane til at enkelte mjølslag frå Mylnå kan vere ulikt mjøl frå andre møller.