Rallarrosa stølsysteri

Historie

I Kårdalen, lengst oppe i Flåmsdalen, kloss i Rallarvegen, finn du Rallarrosa stølsysteri. Me ystar brun og kvit tradisjonsost av fersk, rå geitemjølk. Geitene på stølen kjem frå Sogn Jord- og Hagebruksskule og Dalsbotten, ein gard om lag 10km lenger ned i dalen. Me er på stølen frå midten av juni til midten av september

Ystinga har me lært frå budeiene som stølte på fjellstølane i fjella som omkransar dalen. Ysteriet har namn etter rallarrosa, eller geiteramsen, som blomstrar i mengder kring stølen i juli og august. Dette var og ”rosa” som følgde rallaren der han strevde seg fram med veg og jarnbane i tidlegare tider.

På stølen sel me i tillegg til ost, enkel stølskost. Anten du kjem over fjellet, eller tek Flåmsbana frå Flåm opp til Vatnahalsen eller Myrdal, fører Rallarvegen deg ned ”svingane” til oss.

God og mett, med ost i sekken og minne om Sokka, Kvitkoll og Blåmann, går vegen vidare ned dalen gjennom storslegen natur.

Me ønskjer deg ein triveleg tur!